Bónusljóð, ein mest selda ljóðabók allra tíma á Íslandi, hefur nú loksins verið aukin, endurunnin, endurskoðuð og endurprentuð til samræmis við ströngustu kröfur neytenda og alþjóðlegra staðla um gæði ljóðmetis.

Bókin hefur fyrir löngu öðlast „költstatus“ í íslensku bókmenntalífi og markar upphaf ferils höfundar sem hefur orðið ein mikilvægasta rödd sinnar kynslóðar og fengið verðlaun jafnt heima sem erlendis.

Það er sjaldgæft að ljóðabækur nái að vekja athygli á öðrum málum en frummálinu en Bónusljóð komu nýlega út á ítölsku og frönsku í þýðingu Walter Rosselli hjá virtum forlögum og í næstu viku kemur hún út á færeysku. Nú er hún loksins fáanleg á ensku í þýðingu Elísabetar Jóhannesdóttur og Andra Snæs.