Faðir Brown hefur lengi verið einn ástsælasti einkaspæjari enskra glæpasagnabókmennta. Hann kom fyrst fram á sjónarsviðið snemma á 20. öld en hefur gengið í endurnýjun lífdaganna í skemmtilegum sjónvarpsþáttum á upphafsárum 21. aldar.
Þessi kaþólski sveitaprestur er góðlegur ásýndum og lætur lítið yfir sér. Sposkur á svip sinnir hann sóknarbörnum sínum af samúð og virðingu. En undir hæglátu yfirbragði prestsins býr næmur skilningur á mannlegu eðli, ekki síst hinum myrku hliðum þess. Með skörpu innsæi sínu og hljóðlátum vitsmunum leysir faðir Brown iðulega flókin sakamál sem reyndustu lögregluforingjar standa ráðþrota frammi fyrir.