Gerpla, eitt af stórvirkjum Halldórs Laxness, kom fyrst út árið 1952, naut vinsælda frá upphafi og átti eflaust drjúgan þátt í að Halldór Laxness hlaut Nóbelsverðlaunin í bókmenntum árið 1955.
Sagan gerist á 11. öld þegar tveir vestfirskir garpar sverjast í fóstbræðralag að fornum sið. Gerplu má kalla rangsnúna hetjuharmsögu. Hún er í sögualdarstíl en hetjurnar fallnar af stalli. Sagan er margræð og beitt háðsádeila á stríðsrekstur og hetjudýrkun að fornu og nýju en ekki síður á þá sem fylgja í blindni leiðtoga eða hugsjón og fórna allri mennsku fyrir ímyndaða dýrð.