Aðdáendur myndasagnaflokksins Goðheima eru ófáir
en bækur þær nutu gríðarlegra vinsælda hér á
landi á síðari hluta síðustu aldar. Nú hefur
verið ákveðið að endurútgefa seríuna vinsælu,
vegna fjölda áskoranna. Fyrsta bókin ber heitið
Úlfurinn bundinn en þar segir af ævintýrum
þrumuguðsins Þórs. Þrumur og eldingar lýsa upp
himininn í Miðgarði og skyndilega birtist
þrumuguðinn Þór á vagni sínum. Með í för er Loki
hinn lævísi og klækjabrögð hans verða til þess
að mennsk systkin, Þjálfi og Röskva, fylgja
guðunum til Ásgarðs. Þar er voðinn vís því
sjálfur Fenrisúlfur gengur laus.