Meira sokkaprjón inniheldur 74 prjónauppskriftir að alls kyns sokkum, allt frá agnarsmáum ungbarnasokkum upp í sokka fyrir fullorðna, bæði konur og karla. Við hönnun sokkanna var áhersla lögð á að hafa uppskriftirnar einfaldar og aðgengilegar og með nákvæmum útskýringum á þeim aðferðum sem eru notaðar. Byrjendur í sokkaprjóni geta því hæglega fundið uppskriftir í bókinni sem auðvelt er að fylgja.

Sokkarnir eru bæði einlitir og með skrautlegum munsturbekkjum svo allir ættu að finna eitthvað við sitt hæfi. Hér er því komin eiguleg bók með fjölbreyttum uppskriftum að sokkum sem nýtast allt árið um kring, í skólanum, útivistinni eða heima.
Guðrún S. Magnúsdóttir hefur áður sent frá sér vinsælar prjónabækur eins og til dæmis Sokkaprjón, Vettlingaprjón og Húfuprjón. Meira sokkaprjón er áttunda bók hennar.