Í Reykjavík barnanna er stiklað á stóru um sögu höfuðborgarinnar okkar, frá því áður en fyrstu íbúarnir tóku sér þar bólfestu og þar til hún varð sú fjölbreytta og líflega borg sem við þekkjum. Í máli og myndum er sagt frá mannlífi og menningu, blokkum og bröggum, gatnakerfi og götulýsingu, skautasvellum og skolpræsum, útsýni og útivist, og öllu mögulegu öðru sem finna má í Reykjavík.

Margrét Tryggvadóttir og Linda Ólafsdóttir hafa hlotið mikið lof fyrir bækur sínar sem eru í senn fróðleiksnámur og listaverk fyrir alla fjölskylduna. Bæði Íslandsbók barnanna og Reykjavík barnanna hlutu Fjöruverðlaunin og voru tilnefndar til Íslensku bókmenntaverðlaunanna. Myndirnar í þessari bók hlutu silfurverðlaun í samkeppni Félags íslenskra teiknara og Barnabókaverðlauna Reykjavíkur.