Skáldið Jóhannes úr Kötlum (1899-1972) lifði
mikla umbrotatíma í sögu og bókmenntum heimsins
og ef velja ætti eitt skáld sem fulltrúa 20.
aldarinnar á Íslandi yrði þar næsta
óhjákvæmilega hann. Ekkert íslenskt skáld sýnir
eins nákvæmlega þróun ljóðlistarinnar hér á
landi eins og þessi fjölhæfi og afkastamikli
höfundur sem færði þjóðinni svo margar perlur.

Jóhannes úr Kötlum hóf feril sinn sem
nýrómantískt skáld og á kreppuárunum var hann í
broddi fylkingar róttækra skálda. Í umróti
stríðsára og eftirstríðsára gerði hann tilraunir
með frjálsa bragarhætti og endurnýjaði form sitt
af listfengi og frumleika. Loks náði hann í
alþjóðlega róttæka bylgju á sjöunda áratugnum og
stóð á nýjum hátindi ferils síns þegar hann féll
frá.
Í úrvalinu eru ljóð úr öllum bókum
Jóhannesar fyrir fullorðna, bæði frumsamin og
þýdd, sem gefa breiða mynd af margslungnum
ljóðheimi skáldsins. Silja Aðalsteinsdóttir sá
um útgáfuna og ritar inngang.