Fararefni geymir safn greina sem urðu til í framhaldi af málþingi sem efnt var til haustið 2022 um Þorstein frá Hamri og verk hans. Að þinginu stóðu Bókmennta- og listfræðastofnun Háskóla Íslands og Stofnun Árna Magnússonar í íslenskum fræðum ásamt félagi sem ber heitið Arfur Þorsteins frá Hamri og hefur að markmiði að halda minningu skáldsins og verkum á lofti.

Hér fjalla ellefu manns, skáld og fræðafólk, um verk Þorsteins og viðfangsefnin eru fjölbreytt. Fremst í bókinni er birt grein Þorsteins sjálfs frá árinu 1961 þar sem hann lýsir átthögum sínum, en höfundar annarra greina varpa úr ólíkum áttum og með ólíkum aðferðum ljósi á ljóð hans, sagnaskáldskap og önnur skrif. Ástráður Eysteinsson ritstýrir safninu og skrifar inngang.