Enn á ný birtist Sigríður Björnsdóttir á bók. Nú eru það hennar eigin skrif sem hún býður upp á en 94 ára gömul lauk hún við bókina Dieter Roth in My Life: Memories.
Bókin er ómissandi fyrir þá sem áhuga hafa á íslenskri myndlistarsögu og bakgrunni þeirrar grósku sem var í íslenskri myndlist á sjöunda áratugnum og framlagi Dieters Roth. Fjöldi ljósmynda skerpir sýnina á aðstæður Sigríðar og á korti af Reykjavík eru merktir helstu staðir sem við sögu koma.

Útgefandi er hið virta listaforlag Hauser & Wirth Publishers í Zurich í Sviss. Þeir segja í bókarkynningu:

Höfundur kynntist hinum 26 ára Dieter Roth í Kaupmannahöfn árið 1956. Ári síðar flutti Dieter til hennar í Reykjavík og þau giftu sig. Tæpum sjötíu árum síðar segir Sigríður nú frá kynnum þeirra, barnaláni, hæðum og lægðum í hjónabandinu og að lokum skilnaði. Fyrir utan vinnu hennar við eigin list og hlutverki hennar sem móðir og eiginkona, lýsir höfundur samvinnu- og tilraunastarfi sínu með Dieter. Hún segir frá kynnum þeirra við vini og samstarfmenn innan hins þéttofna samfélags íslenskra listamanna og upphafi hinnar margþættu sköpunar Dieters Roth.
Á þessu tímabili hannaði Dieter húsgögn og skartgripi og stundaði leturfræði, tilraunir með nýja prenttækni og vann að bókverkum. Árið 1957 stofnuðu þeir Einar Bragi skáld „ed forlag“.
Eftir skilnaðinn 1964 vann Dieter að list sinni víða í Evrópu en einnig í Mosfellsbæ og á Seyðisfirði og var í samstarfi við börn sín og barnabörn þar til hann lést árið 1998.
„Dieter Roth in My Life - Memories“ er einstök lýsing – heiðarleg og mjög persónuleg frásögn af mikilvægu tímaskeiði í lífi Sigríði Björnsdóttur, sem hún deilir með manni sem hún lýsir sem ástinni í lífi sínu.