„Árið 1993 var ég fjórtán ára þegar Viktoría, besta vinkona mín, hvarf. Föstudagskvöldið 12. febrúar fór hún með mömmu sinni í verslunina Hólmakjör í Stykkishólmi. Hún beið í bílnum á meðan mamma hennar fór inn en þegar hún kom aftur út var Viktoría horfin. Hún hefur ekki fundist síðan.“
Rakel fær óvenjulega ábendingu um að taka fyrir ríflega þrjátíu ára gamalt hvarf unglingsstúlku í hlaðvarpi sínu. Hún ákveður að kanna málið og fljótlega kemst hún að því að ekki eru allir ánægðir með að hún sé að grafa upp fortíðina. Og sjálf þarf Rakel að takast á við nýjan veruleika eftir að kunnugleg kona hringir óvænt bjöllunni heima hjá þeim hjónum.