Árið 1608 sver ung stúlka í Skagafirði, Þórdís Halldórsdóttir, eið um að hún sé hrein mey eftir að upp kemur kvittur um ástarsamband hennar við mág sinn en slíkt var dauðasök á tímum stóradóms. Fimm mánuðum síðar fæðir hún barn. Þórdís má lifa með ásökunum um blóðskömm og í trássi við landslög er henni gert að sæta pyntingum segi hún ekki til barnsföður síns. Á hverju ári ríður hún suður heiðar til að mæta fyrir Alþingi á Þingvöllum en heill áratugur líður þar til dómur er kveðinn upp.

Þóra Karítas Árnadóttir er sjálfstætt starfandi leikstjóri og framleiðandi. Hún sendi árið 2015 frá sér sannsöguna Mörk – saga mömmu sem hlaut góðar viðtökur lesenda og var tilnefnd til Fjöruverðlaunanna. Blóðberg, sem kom fyrst út árið 2020, er fyrsta skáldsaga hennar.