Odd Strange hefst við í gömlu hjólhýsi í nágrenni Malaga og hefur lifibrauð sitt af einkaspæjarastörfum. Hann á sér óvenjulega sögu: ólst upp í Reykjavík hjá afar sérkennilegum foreldrum, var júdókappi og starfaði um tíma í lögreglunni í Osló.

Dag einn bankar ung kona upp á hjá Odd og biður hann að finna týnda vinkonu sína. Leitin að henni rifjar upp fyrir honum hryllilegt mál sem snerist um norskan fjöldamorðingja sem aldrei náðist, rannsókn sem varð Odd gríðarlega dýrkeypt. Getur verið að sami morðingi sé aftur kominn á kreik?
Magnað andrúmsloft einkennir þessa ískyggilegu og óhefðbundnu glæpasögu sem grípur lesandann fantatökum strax á fyrstu blaðsíðu.
Jón Atli Jónasson er margverðlaunaður fyrir leikverk sín, sjónvarps- og kvikmyndahandrit. Nýlegar glæpasögur hans, Brotin og Eitur, fengu báðar afbragðsdóma.