Á áttunda og níunda áratug síðustu aldar ákvað hópur ungra frjálshyggjumanna undir merkjum Sjálfstæðisflokksins að gera „uppreisn" og breyta Íslandi. Helsti leiðtogi þeirra varð Davíð Oddsson, sem átti eftir að verða einn áhrifamesti og jafnframt einn umdeildasti leiðtogi Íslands. Þetta er saga Davíðs og samfélagsins sem hann umbylti. Ungu frjálshyggjumennirnir voru gjarnan skilgreindir sem Eimreiðarhópurinn. Þeir komust til áhrifa með það að markmiði að selja ríkiseignir, og dreifa valdi, frelsi og þekkingu meðal almennings. Saga Davíðs er rakin allt frá barnsaldri og varpað ljósi á bakgrunn hans. Rætt er við samferðamenn um manninn að baki leiðtoganum og aðferðir hans við að ná völdum og halda þeim. Gamansemi hans er þekkt ekki síður en harkan gagnvart andstæðingum. Í honum bjó ólgandi eðli listamannsins ekki síður en viljinn til að sigrast á andstæðingum. Davíð Oddsson átti þann feril að verða borgarstjóri, forsætisráðherra og loks seðlabankastjóri þaðan sem hann var hrakinn úr starfi eftir hrunið. Hann varð ritstjóri Morgunblaðsins en gerði síðar árangurslausa tilraun til að stíga aftur inn á svið stjórnmálanna. Hann var þekktur fyrir að tapa ekki kosningum en forsetaembættið stóð honum ekki til boða. Eftir hann eru djúp spor í sögu Íslands.