Eina hverfula stund eftir Njörð P. Njarðvík er hugnæm og djúpskyggn ljóðabók sem fær lesanda til að staldra við og hugleiða tímann og mannsævina, eilífðina og andartakið. Þetta er sjötta ljóðabók höfundar en hálf öld er liðin síðan sú fyrsta kom út. Njörður var í áratugi kennari og fræðimaður í íslenskum bókmenntum við Háskóla Íslands, seinast prófessor. Auk ljóða hefur hann sent frá sér skáldsögur, barnabækur, kennslubækur og fræðirit, og þýtt fjölmörg verk á íslensku, ekki síst ljóð.

Njörður fagnar 60 ára rithöfundarafmæli í ár. Hann hefur hlotið fjölda viðurkenninga fyrir störf sín, þar á meðal Verðlaun Jónasar Hallgrímssonar árið 2006 og viðurkenningu úr Rithöfundasjóði Ríkisútvarpsins. Þá hefur Sænska akademían verðlaunað hann fyrir þýðingar og kynningu á sænskri menningu og árið 1995 var hann sæmdur riddarakrossi finnsku Ljónsorðunnar. Einnig hefur hann fengið stórriddarakross finnsku Ljónsorðunnar, stórridddarakross Kungliga Svenska Nordstjärneorden og riddarakross frönsku heiðursfylkingarinnar.