Frá því að ég man eftir mér hef ég notið þess að skapa. Ég hef notið þess að fara í gegnum frjóan farveg arkitektsins, en jafnvel fyrr, allt frá því að ég lærði að prjóna hefur bandið, verið rauði þráðurinn í sköpunargleði minni. Eftirvæntingin við að velja sér verkefni og efnivið, glíman við þrautina þegar prjónauppskrift á prenti er yfirfærð í fast form þráðarins, hugarró þegar mörg hundruð lykkjur taktfast forma flíkina. Uppskeran þegar verkefninu er lokið og stoltið þegar flíkin er tekin í notkun eða gefin þeim sem manni er kær. Sjálfbærni.

Þetta er grunnurinn að einrúm hönnun og bandi. Þetta er farvegurinn sem ég kynntist og lærði að meta þegar ég ólst upp. Ég er lánsöm að fá tækifæri til að fleyta þeirri ánægju, gleði og hugarró, sem ég hef notið, yfir til þeirra sem vilja nýta sér efni þessarar bókar.