Lopapeysur innblásnar af glæpasögunum um Hildi!
Glæpasögur Satu Rämö um ísfirsku lögguna Hildi hafa farið sigurför um heiminn. Bækurnar hafa selst í milljónum eintaka og sjónvarpsþáttaröð sem gerð var upp úr þeirri fyrstu naut mikilla vinsælda.
Íslenska lopapeysan leikur stórt hlutverk í sögunum um Hildi og í þessari bók hefur höfundurinn fengið Sigríði Sif Gylfadóttur til liðs við sig til að hanna uppskriftir að tólf peysum sem allar eru innblásnar af eftirminnilegum persónum úr bókaflokknum. Hér eru að sjálfsögðu peysur tileinkaðar Hildi og Jakobi en einnig uppskriftir með kunnugleg nöfn eins og Rósa, Björk, Tinna og Freysi. Auk þess má hér finna uppskrift Rakelar hjá Lopamunstur.is að peysunni sem Hildur klæðist í sjónvarpsþáttunum.
Hildur – lopapeysur er einstaklega falleg prjónabók með áherslu á sígildar íslenskar lopapeysur en einnig má finna léttari og látlausar útfærslur. Flestar uppskriftanna eru bæði í kvenna- og karlastærðum.