Hljómleikur er auðveld og barnvæn kennslubók og hjálpar byrjendum að læra að leika einfalda hljóma á ukulele og hljómborðshljóðfæri. Gengið er út frá því að allflestir kunni lögin í bókinni þannig að auðvelt er að einbeita sér að hljóðfærunum og því að leika á þau. Bókin er hugsuð sem söngeflandi námsefni og er hvatt til þess að lögin í henni séu sungin jafnframt því að leika hljómana sem eru gefnir við textana. Þegar nemandi hefur farið í gegn um Hljómleik er líklegt að hann hafi náð þeirri færni að geta farið á netið, fundið texta við lög sem eru á hans áhugasviði og í flestum tilfellum leikið uppgefna hljóma við þau. Segja má að bókin brúi bilið milli þess að vera alger byrjandi og þess að geta nýtt sér uppgefna texta með hljómgerðum í bókum eða á internetinu.