„Henni býður við þessu. Þetta er allt svo viðbjóðslegt, kjötið, þessi drykkur, þetta magnaða landslag, þessi fallega birta. Hana langar ekkert í þetta. Langar í eitthvað allt annað.“

Vinahjón eru á leiðinni út á land að rifja upp gömul kynni. Það sem átti að vera hugguleg bústaðaferð breytist á síðustu stundu í útilegu í afskekktum dal, auk þess sem ferðafélagarnir eru ekki þeir sömu og upphaflega stóð til. Eftir að myrkrið skellur á fara samskiptin að súrna og spennan magnast í hópnum. Brátt kemur í ljós að ekki er allt með felldu og óvíst er hver lifir nóttina af.

Undir fögru skinni er æsispennandi og nýstárleg hrollvekja sem dregur upp hárbeitta svipmynd af nútímafólki andspænis óhaminni náttúru, þar sem margt býr í myrkrinu.