Maxímús Músíkús dettur heldur betur í
lukkupottinn þegar hann rambar inn í
tónlistarhús þar sem sinfóníuhljómsveit æfir sig
fyrir tónleika. Maxi þekkir tónlist mannfólksins
úr frægðarsögum langafa síns en nú fær hann
loksins að kynnast henni af eigin raun. Í
þessari fjörugu sögu er lesandinn leiddur inn í
töfraheima tónlistarinnar í orði og tónum.
Bókinni fylgir geisladiskur þar sem Valur Freyr
Einarsson les söguna og Sinfóníuhljómsveit
Íslands leikur tónverkin sem við sögu koma undir
stjórn Rumons Gamba.