Safnritið Með flugur í höfðinu er yfirlit um íslensk prósaljóð og örsögur, eftir tugi skálda sem hafa fengist við þessi heillandi en vandmeðförnu bókmenntaform. Textarnir eru afar fjölbreyttir, sumt er fyndið og spaugilegt, annað ljóðrænt og angurvært, sumt hvort tveggja, en þeir eiga það sameiginlegt að liggja á mörkum ljóðs og sögu og fá margir spennu sína af því.

Þau Kristín Guðrún Jónsdóttir og Óskar Árni Óskarsson hafa safnað efninu og nálgast verkefnið úr ólíkum áttum. Kristín Guðrún er prófessor í spænsku við Háskóla Íslands og hefur einkum fengist við bókmenntir frá Rómönsku-Ameríku en Óskar Árni er skáld sem hefur ekki síst getið sér orð fyrir örsögur og prósaljóð.