Eftir að heimspekingurinn Sókrates kvaddi hið jarðneska líf reis upp hreyfing manna sem vildu halda nafni hans á lofti. Í þeim hópi var Xenófon Aþeningur sem safnaði sögum, samræðum og spakmælum síns gamla kennara. Markmið hans var þó ekki síður að verjast og svara málflutningi ákærenda úr réttarhöldunum þar sem Sókrates var dæmdur til dauða.
Minningar um Sókrates er safnrit þar sem brugðið er upp myndum af hinum víðkunna spekingi og hans fjölbreyttu hugðarefnum. Þessi merka bók var um langt skeið álitin vera ein traustasta heimildin úr fornöld um Sókrates og hugmyndaheim hans.