Afar vegleg og vönduð ljósmyndabók um atburðina á Reykjanesskaga frá því að jarðskjálftahrina hófst þar í janúar 2020. Bókin segir frá eldgosum, rýmingu, slysförum, varnargarðagerð, eyðileggingu og uppbyggingu. Bókin er smækkuð útgáfa af fyrri bók höfundarins, Reykjanes vaknar, á ensku, í minna og léttara umbroti og hentug til gjafa og minja um þessa ótrúlegu atburði. Fyrri bókinni hefur verið afar vel tekið og hlotið lof þeirra sem til atburðanna á Reykjanesi þekkja og öðlast sterkan sess í hjörtum Grindvíkinga og annarra sem atburðunum tengjast. Þessi útgáfa er rétt eins vönduð og hefur strax fengið góðar viðtökur. Höfundurinn er ljósmyndari að atvinnu og mennt og hefur í yfir 15 ár skrásett leit, björgun og neyðarstörf á Íslandi og víðar. Hann hefur fylgt eftir atburðunum á Reykjanesi frá fyrstu stundu þegar íbúar komu saman á íbúafundi í íþróttahúsinu i Grindavík á köldum janúardegi árið 2020. Síðan þá hefur hann í á annað hundrað ferðum á svæðið tekið nærri 200 þúsund myndir og í þessari bók eru valdar myndir úr því yfirgripsmikla safni sem segja söguna á lifandi hátt eins og fæstir hafa áður séð hana.