„Gabb, blekking, þvættingur, vitleysa, sýndarmennska,“ svo vitnað sé í Árnastofnun um merkingu tökuorðsins húmbúkk.

Faðir höfundar vaknar eina nótt við að ókunnugur maður stendur í svefnherbergisdyrunum á heimili hans við Skólavörðustíg. Aldarfjórðungi síðar rifjar sonurinn upp þessa reynslu föðurins, og styðst við heimildir sem óvænt tengdust atvikinu. Samhliða því fer hann á stefnulaust flakk um fortíð og nútíð, frá miðbæ Reykjavíkur upp á Mýrar og út í heim, með viðkomu í hugar heimi annarra höfunda. Hér sýnir Bragi Ólafsson á sér nýja hlið; hann beinir athyglinni að því sem ekki er endilega skáldskapur.

Bragi Ólafsson er fæddur í Reykjavík árið 1962. Á tæpum fjórum áratugum hefur hann sent frá sér hátt í þrjátíu bækur, jafnt ljóð, smásögur og skáldsögur, og einnig fengist við leikritaskrif og þýðingar. Um árabil starfaði hann sem tónlistarmaður, meðal annars með hljómsveitunum Purrkur Pillnikk og Sykurmolarnir, og hefur frá árinu 1986 verið félagi í útgáfufyrirtækinu Smekkleysu, sem hefur haft víðtæk og djúp áhrif í menningarlífi landsins.

Meðal skáldsagna Braga eru Gæludýrin, Sendiherrann, Staða pundsins og Gegn gangi leiksins. Leikrit hans Belgíska Kongó og Hænuungarnir nutu fádæma vinsælda.