„Það sem vekur okkur ugg er að vita ekki hvaða farm við eigum eftir að flytja til landsins á bakaleiðinni. Getgátur á borð við barnaleikföng og heimilistæki færa okkur ekkert nær sannleikanum.“

Höfundur lokast inni í yfirgefinni byggingu í Austurbænum. En áður en það gerist nær hann að fanga ýmislegt sem hann langar til að koma í orð. Hann fer út í Gróttu og hittir þar fyrir fólk í fjölskyldu sinni, lifendur og dauða; hann sér fljúgandi plastpoka út um glugga á sjöundu hæð í Reykjavík; hann kemur við í plötubúðum og gengur um ólíkar borgir heimsins, eins og einhver flâneur. Hann sankar að sér allra handa aðföngum. Líkt og í síðustu bók sinni, Innanríkið – Alexíus, veit hann stundum ekki hvort hlutirnir verði upprunalega til í höfði hans eða séu aðfengnir – hann veit reyndar ekki hvort einhver munur er á þessu tvennu.

Bragi Ólafsson er fæddur í Reykjavík árið 1962. Fyrsta bók hans, ljóðabókin Dragsúgur, kom út 1986. Meðal skáldsagna Braga eru Hvíldardagar, Samkvæmisleikir, Fjarveran og Sögumaður. Fyrir tveimur árum kom út bók hans Innanríkið – Alexíus, og er þessi bók hér, Innanríkið – Aðfangadagar, sjálfstætt framhald. Á þessu ári kemur einnig út ljóðaúrval Braga, Á horni Bayswater Road og Lækjargötu – 100 og eitthvað ljóð, 1986–2026.